ابويا

أبويا مكنش بيطيق خطيبتي ولا أهلها أبدًا، وكان بصورة يومية بيحاول يقنعني إني أفسخ خطوبتي وكان بيقولي إن البنت دي طالعة من مكان خبيث وإن الناس دول مش كويسين أبدًا، لكني مكنش عندي أي استعداد أسيبها، حُب ٤ سنين كلية ومعنديش استعداد أتنازل عنها أبدًا..

وده خلى الخلافات تزيد بيني وبين أبويا وبقا يتعنت في إنه يساعدني أو يشتريلي حاجات ناقصة في الشقة رغم إنه مقتدر ومعاه، وقالي لو سبتها واتجوزت أي واحدة تانية هيجهزلي كل حاجة بدون ما أدفع مليم واحد..

وفضلت حيران ومش عارف أعمل أيه، خطيبتي كانت عارفة إن والدي عايزني أفسخ خطوبتي معاها وكانت بتحاول تراضيني بكل الطُرق عشان مسبهاش ولا أفكر حتى في ده، وفضلنا في الحيرة دي لحد ما والدي تعب ونقلناه المستشفى، جلطة في المخ مرة واحدة واتحجز ووقع فترة في غيبوبة وحالته الصحية وصلت لأسوأ مرحلة ممكنة..

في الفترة دي بقيت أنا المسؤول عن كل حاجة، عن والدي المريض وأخويا اللي في الثانوية العامة، وعن نفسي بما إن أمي متوفية من زمان، وبقيت بدفع مصاريف المستشفى وبدفع مصاريف دروس أخويا وبجهز شقتي من فلوس أبويا اللي في البنك من وراه..

كنت عارف إنه هيتضايق لكنه في النهاية شايل الفلوس دي عشاني أنا وبس، وفضل محجوز ٣ أسابيع والحياة روتينية، مفيش جديد غير خطيبتي اللي بقت تيجي شقتنا تجبلنا أكل وتنضف الشقة وأحنا مش موجودين وتمشي، بنت حلال معرفش أبويا بيكرهها ليه..

لحد ما حصلت حاجة أغرب من الخيال لدرجة إني مكنتش مقتنع ولا مصدق إنها حصلت، أخويا اللي ماليش غيره في الدنيا غاب يوم كامل عن البيت، وتاني يوم لقيت مكالمة من ناس معرفة بيقولوا إن أخويا مقتـ ـول ومرمي في الترعة..

روحت زي المجنون لقيت المباحث هناك والدنيا مقلوبة، أخويا بقا عبارة عن جثة وكان واضح إنه اتسرق منه فلوسه وتليفونه واتغدر بيه، مكان مهجور وبتحصل فيه سرقات لكن مكنتش أتخيل إن أخويا يكون ضحية من ضحايا المكان ده..

نفسيتي اتدمرت وأنا شايف البيت بيخرب، أبويا بين الحياة والموت، أخويا اتقتـ ـل، كل حاجة متدمرة، وفضلت في حالة نفسية سيئة جدًا ومتوقع الأسوأ وهو موت أبويا، ولو كمل وعاش وسمع خبر موت أخويا مش هيتحمل وهيحصله..

وبعد شهرين خطيبتي اقترحت إننا نتجوز عشان تكون جمبي وتراعيني لحد ما أبويا يقوم بالسلامة، وبعد تفكير طويل لقيت إنه حل مثالي فعلًا، نتجوز وتراعيني وأنا أركز مع أبويا والمستشفى اللي هو فيها..

وكلمت أعمامي وعملنا فرح صغير خالص ومحدش وجهلي عتاب إني اتجوزت وأبويا مريض، كان أمر طبيعي مش ندالة ولا خيانة مني لأبويا المريض..

واتجوزت أنا ومنار في النهاية ودخلت شقتي اللي جهزتها من فلوس أبويا في حسابه البنكي، وقدرت فعلًا تهون عليا كتير أوي في حياتي، ومع ذلك كانت بتزور أبويا معايا بصورة يومية وترعاه وتهتم بيه أكتر مني، معرفش أبويا ليه كان ظالمها بالطريقة دي..

لحد ما جالي تليفون من المستشفى واتقالي إن حصلت معجزة وأبويا فاق وبقا كويس، روحت على المستشفى ولقيته فايق فعلًا وبقا بيتكلم واتقال إنه هيخرج قريب كمان، حضنته بكل قوتي وبكيت زي العيل الصغير، وفضلت معاه لحد ما اتكتبلنا على خروج، وفي الطريق بقا كل همي أنا هقوله ازاي إن أخويا اتقتـ ـل بالطريقة دي..

بس كان لازم أقوله عشان ميعرفش من الغريب، وقولتله وأنا إيدي على قلبي أحسن تحصله حاجة أو يتعب تاني، لكن العجيب إنه قال إنا لله وإنا إليه راجعون وبس، ودخل البيت وكأن مفيش أي حاجة، مكنتش أعرف إن أبويا بالإيمان الكبير ده..

حتى إنه تقبل موضَوع جوازي واتعامل مع منار بصورة طيبة جدًا، حسيت وقتها إن حياتي خلاص بقت مثالية، لحد تالت يوم بالليل لقيت أبويا بيصرخ بأعلى صوته وبينادي عليا من شقته اللي تحت، نزلت أجري عليه لقيته بيقولي إن أخويا عايش ممتتش وإنه كان هنا من شوية..

حسيت بالخوف من كلامه وطريقته، وهو فضل يحلف إن أخويا عايش وهيرجع قريب فعلًا، وطلعت شقتي ولقيت مراتي خايفة وبتترعش، فضلت أطمن فيها رغم إني كنت قلقان وخايف، هل أبويا اتجنن ولا فعلًا أخويا رجع..

بس واضح إن أبويا مكنش بيكذب، لأني بقيت بحس بحركة غريبة قدام باب الشقة بالليل، وكنت بسمع صوت خبط على باب شقتي كل شوية، حتى إني لما كنت بخرج من باب الشقة كنت بشم ريحة البرفان اللي أخويا كان بيحطه دايمًا..

لحد ما كنت في شغلي ولقيت مراتي بتتصل بيا وبتصرخ، وبتقول إن باب الشقة بيتفتح عليها ولقت آثار دم وكلام غريب مكتوب، رجعت أجري لقتها خايفة ومرعوبة ومش قادرة تتكلم..

وبعد ٣ أيام رجعت من برة لقيت الحكومة والمباحث في بيتنا وأول ما شافوني مسكوني واتهموني بقتل أخويا أنا ومراتي، وبقيت هتجنن ومش عارف ازاي عرفوا حاجة زي دي، لكن الغبية منار اعترفت بكل حاجة..

سيب لايك وكومنت بتم وهرد عليك بباقي القصه المشوقة 🔥 👇👇